Trátase dunha recompensa á labor dos estudantes do Bacharelato de Artes e Deseño de Ribadavia
Ribadavia, 27 de febreiro de 2026. Os organizadores da Feira do Viño do Ribeiro, Concello de Ribadavia e C.R.D.O. Ribeiro, Intregaron hoxe na sede do Consello Regulador, en Ribadavia, un lote-agasallo para premiar a Inês Oliveira Regal, estudante de 2º de Bacharelato na modalidade de Artes Plásticas, Imaxe e Deseño no IES O Ribeiro, por presentar unha proposta artística moi orixinal para participar no concurso de carteis para a Feira do Viño, que terá lugar do 1 ao 3 de maio.
O motivo deste galardón é premiar dun xeito especial a alta participación dos estudantes do centro de ensino ribadaviense, onde o profesorado anima, ano a ano, aos seus alumnos a formar parte no concurso de carteis para a Feira do Viño do Ribeiro, case como un traballo de clase máis.
A obra premiada está creada pola estudante ourensá Inês Oliveira Regal, a través dunha técnica mixta, combinando debuxo a rotuladores de alcohol e témpera sólida. O concepto creativo do cartel baséase na época da orixe da Feira do Viño, en 1963, na que estaba de moda o estilo desta creación, o Pop Art. En palabras da artista “trátase de transmitir a importancia cultural do viño do Ribeiro e o seu carácter festivo, utilizando unha imaxe simbólica co viño branco como elemento central da celebración.”
