- As solicitudes poderán realizarse ata o vindeiro venres 20 de marzo.
- A Feira celebrarase o primeiro fin de semana de maio, os días 1, 2 e 3.
Ribadavia, 3 de marzo de 2026
Desde este luns, 2 de marzo, e ata as 14.00 horas do venres 20 de marzo de 2026, permanece aberto o período de inscrición para adegas e colleiteiros que queiran participar na 63ª edición da Feira do Viño do Ribeiro, que se celebrará os días 1, 2 e 3 de maio de 2026 en Ribadavia.
Poderán formalizar a súa solicitude as adegas e colleiteiros inscritos e certificados no Consello Regulador da Denominación de Orixe Ribeiro.
A Feira contará cun total de 34 stands, que serán asignados segundo a orde de solicitude. No caso de que a demanda supere o número de espazos dispoñibles, establecerase unha lista de espera. A ubicación dos stands realizarase mediante sorteo público no Salón de Actos do Concello de Ribadavia, comunicándose previamente ás persoas participantes a data e hora da súa celebración.
As solicitudes poden tramitarse a través do teléfono 988 477 100 ou do correo electrónico feiradoribeiro@ribadavia.es, debendo formalizarse antes da finalización do prazo establecido.
A organización ofrecerá aos participantes casetas equipadas cun deseño funcional e atractivo, sistema de entrega, recollida e lavado de copas, promoción e difusión a través do Plan de Medios, así como a posibilidade de participar nas catas comentadas, showcookings e no Concurso da Cata Popular, reservado exclusivamente ás adegas e colleiteiros inscritos na feira.
O horario xeral de apertura ao público dos stans será:
- Venres, 1 de maio: de 12.00 a 00.00 horas
- Sábado, 2 de maio: de 11.00 a 00.00 horas
- Domingo, 3 de maio: de 11.00 a 22.00 horas
